Бат-Өлзий сумын Эрүүл мэндийн төвийн 2024 оны санхүүгийн үйл ажиллагаанд хяналт шалгалт хийсэн тухай

        Аймгийн Засаг даргаар батлуулсан 2025 оны гүйцэтгэлийн төлөвлөгөө, Санхүүгийн хяналт, дотоод аудитын газрын даргын 2025 оны 05 дүгээр сарын 02-ны өдөр баталсан 29/10 дугаар удирдамжийн дагуу Бат-Өлзий сумын Эрүүл мэндийн төвийн 2024 оны санхүүгийн үйл ажиллагаанд хяналт шалгалтыг хийж гүйцэтгэлээ.

Тухайн байгууллагын санхүү, нягтлан бодох бүртгэлийн үйл ажиллагаа тасралтгүй явагдаж, санхүүгийн тайлан баланс, ажил гүйлгээний мэдээ тайланг гаргаж хэвшсэн боловч Өмч хамгаалах зөвлөлийг шинэчлэн байгуулаагүй, хийсэн ажлын тайлан байхгүй тооллогыг жилд нэг удаа явуулж байгаа нь бараа материал дутах эрсдлийг үүсгэсэн, шатахууныг шаардах хуудасгүйгээр зарцуулсан, албан хэрэгцээнд ашиглаж байгаа автомашины жолоочийн тооцооны хуудсыг бөглөөгүй, нягтлан бодогч шатахууны тооцоо бодсон баримтанд спидометрийн заалтыг тэмдэглээгүй, хяналт тавьдаггүй, ээлжийн амралтын хуваарь баталсан тушаал гаргадаггүй, мэдэгдлийг буруу бичдэг, ажлаас чөлөөлөгдсөн албан хаагчидтай ээлжийн амралтын эцсийн тооцоо хийдэггүй, ажилчдын төрийн алба хаасан нэмэгдлийг илүү дутуу олгосон, шилэн дансны мэдээллийг хуулийн хугацаанд бүрэн гүйцэт мэдээлээгүй, тушаал дутуу, давхцуулан гаргадаг зэрэг зөрчлүүд нь ажил хариуцсан албан хаагчид ажилдаа хайнга хандсан, санхүүгийн холбогдолтой хууль эрх зүйн мэдлэг дутмаг, санхүүгийн анхан шатны баримтыг тухай бүр бүрдүүлж хэвшээгүй, санхүүгийн үйл ажиллагаанд дотоод хяналт тавьдаггүй зэргээс үүдэлтэй байна. Ийм төсвийн захирагч болон санхүүгийн ажилтнууд төсөв санхүүгийн үйл ажиллагааны талаарх мэдлэг мэдээллээ сайжруулах, холбогдох хууль, дүрэм журмыг судлаж мэдэх, зөв хэрэглэх, санхүүгийн анхан шатны баримтыг тухай бүр бүрдүүлж хэвших, түүнд тогтмол хяналт тавьж байх, дотоод хяналтын нэгжийн үйл ажиллагааг сайжруулах, санхүүгийн ажилтнууд төсвийн шууд захирагчийг мэргэжил арга зүй, мэдээллээр сайн хангаж ажиллахад анхаарах шаардлагатай байна.

Энэ удаагийн шалгалтаар анхан шатны бүрдэл дутуу 1,569,730 (нэг сая таван зуун жаран есөн мянга долоон зуун гуч) төгрөгийн, цалин хөлстэй холбоотой 2,576,277 (хоёр сая таван зуун далан зургаан мянга хоёр зуун далан долоо) төгрөгийн нийт 4,146,007 (дөрвөн сая нэг зуун дөчин зургаан мянга долоо) төгрөгийн зөрчил илэрч дутуу олгосон 1,570,237 (нэг сая таван зуун далан мянга хоёр зуун гучин долоо) төгрөгийг нөхөж олгох, илүү олгосон 1,006,040 (нэг сая зургаан мянга дөч) төгрөгийг суутган тооцох, анхан шатны баримгүй зарцуулсан түлш, шатахуун 1,569,730 (нэг сая таван зуун жаран есөн мянга долоон зуун гуч) төгрөгийг төоүүлэхээр улсын ахлах байцаагчийн акт тогтоож, зөрчлийг цаашид давтан гаргахгүй байх талаар 8 заалт бүхий зөвлөмж өгч ажиллалаа.